Moi luu,
De leste moal dat ik mien blog in het het Grunnegers schrief. Meertmoand, Grunneger Moand is sikkom weer veubie. Luu in Westerwolde hebben weer een baarg diverdoatsie had dizze weke. Haile weke was d’r genog te doun in Westerwolde en doar hebben veul luu ook aan mitwaarkt. Stief bedankt doarveur! Benoam over de oavend van de priesoetlangen van de schriefwedstried heb ik veul reacties had… en aaltemoal haile lovende kritieken. Ook doarveur dank!
Mor noast de Grunneger Weke stond d’r vanzulm ook nog genog aandere zoaken in mien agenda. Mien collega wetholder is drok bezig mien het Strategisch Vastgoed Plan, dei binnenkört noar de road mout. Wie hebben hail veul gebouwen in aigendom het is goud om te kieken of wie dat aalmaol nog neudig binnen. Doarom kieken wie hail sekuur noar wat wie woar doun en of dat neudig is en of wie dat misschain kombineren kennen.
Dinsdag, net as aans, hadden wie college vergoadering en dat is maistied wel een haile laange zit. Altied een baarg te bespreken en ook een mooie gelegenhaid om mekoar even bie te proaten over wat d’r in de aandere portefeuilles (doar hebben wie nog gain Grunneger woord veur ducht mie) speult.
Dunderdagmörgen was ik nuigd om in het koader van de Grunneger Weke veur te lezen aan kinder van de basischool in de bibliothaik in Vlagtwedde. En dat was alderschierst om te doun. Kinder proaten ja bienoa gain Grunnegers meer. Mor ik mout zeggen… dit moal wazzen het de kinder van de schoule oet Bourtang en dat is mie nait tegenvaalen. Mitwaarkers van de bibliothaik hadden een ‘woordenbingo’ moakt. Ik mos een verhoal veurlezen en doarin waren sommige woorden mit vette letters opschreven. Kinder hadden aalmoal stuk pepier mit taikens d’r op en as ze een woord heurden dei op pepier ston dan mozzen ze dei aankruusen. En d’r wazzen meroakel stoere woorden bie! Zoas tuutai, jankend, vrundjes, hoazen, knienen, sikke, robaiten, riezen bezzem, oetvinder, padschovvel, snij, aalbeerens, hoelen, swieniegeltje en steveltjes… Mor ‘t is aal goud goan! Wie hebben haile slimme kinder in Westerwolde!
(foto moakt deur Geert Smit)
Het verhoaltje was schreven deur Luuk Houwing oet Vlagtwedde en dei het vrouger schoolmeester in Bennewolle west. Hai is gain twintig meer, mor zien verhoal of beter gezegd een sprookje en dei was echt van dizze tied! Aiglieks was het een hail laif verhoal woarin kinder hail veurzichtig kennis muiken mit een poar onderdailen van diversiteit. Luuk von het goud as ik dat verhoaltje broeken zol, dus ik zel dat komende tied es even kieken woar wie dat nog meer veur broeken kennen vanoet min portefeuille diversiteit.
Loater dei dag had ik vergoadern van het Doagelieks Bestuur van Afeer in Sodem. Eerste dail van de vergoadern was kennismaoaking tussen het DB en de Ondernemingsroad van Afeer. Was hail zinvol om mit mekoar te proaten over wat de mensen van Afeer bezigholt. Vanzulm hebben wie ook proat over de protestacties dei de mensen vanoet de SW körtsleden holden hebben. Over nait aal te lange tied proaten wie weer mit mekoar want ook de OR het dammit verkaizens en den ken het mor zo wezen dat d’r toch weer aander luu in de OR zitten.
Dunderdagovend was ik nuigd bie een netwaarkbieainkomst van de toeristische ondernemers in Westerwolde. Dei wer in Smeerling holden. ‘ZO! Groningen’ had dit organiseerd en het is hail zinvol om dat veur de vakantietied nog even te doun. D’r kwamen hail baarg zoaken op batterij en wie hebben oetgebraid proat over hou wie d’r veur zörgen kennen dat vekantiegangers dei op moandagmörgen een kop koffie drinken willen, as ze onderwegens binnen veur een wandeling of op fietse, dat ook doun kennen. Dat vaalt nog nait tou. Het mit de kosten en boaten te moaken. Wer ook aandacht besteed aan hou wie onze streek nog meer promoten kennen.
Vrijdagoavend hebben wie de Grunneger Weke in Westerwolde ofsloten mit de ‘Pub Quiz’ in de RSG in Troapel. D’r hadden zug 21 groupen van vaar man aanmeld en dat is ja een haile bult. As college deden wie vanzulm ook weer mit en mout wel eerlieks zeggen dat deur de behoalde resultoaten oet het verleden van het college ik d’r nait veul verduutsie in har dat wie bie de eerste vieve oetkomen zollen. Ik was den ook verbaldereerd dat wie soamen met de luu van ISK Tweie 41 punten hoald haren. Mor d’r ken mor aine winnen dus mos een stoere rekensom oetmoaken wel van ons de eerste pries kreeg. We waren nait rad genog en dus werd ISK Tweie de eerste en wie kregen de tweide pries. Mor ik ken joe zeggen dat wie doar slim grootsk op binnen! Zo wied hebben wie het as college nog nooit schopt.
De top dreie:
1.RSG/ISK Ter Apel team Tweie 41 punten
2. College B & W 41 punten
3. Wandelen in Westerwolde 40 punten
Zotterdagmörgen mos ik om tien uur aantreden bie Radio Westerwolde. Dei bestoan 30 joar en dat liekt me inderdoad reden veur lutje feestje. Mit de börgermeester van Pekel mog ik as openingshandeln de toarte aansnieden. Veur dei tied heb ik nog even in het kört trugge keken op aal dei joaren woar ik tiene doarvan ook oetzendens doan heb.
foto Jan Glazenburg
Joa luu en den is meertmoand veurbie en schrief ik mien ‘blogs’ neie weke weer in het Nederlands. Volgend joar weer de Grunneger Weke en veur wel nog gain Grunnegers proaten ken… dei het den joar de kaans om doar een broescursus veur te volgen!
Ik wens joe aalmoal een schiere (waark)weke tou!
Groutnis,
Giny Luth